الغاشي تعال ماشي..تعال أقعد في ضُلّ التعب شوية..خلّي الدنيا البتجري دي تفوت براها، وأسمع صوتك الحقيقي قبل يضيع في دوشة الأيام.عارف... أصعب سفر ما البقطع الصحارى ولا البعبر البحر، أصعب سفر هو السفر الجوّة النفس.. لمّا تقوم كل صباح شايلك وتمشي، لكن روحك واقفة في نفس الحتة، متكية على وجع قديم، وبتسأل:"أنا لِسّة بخير؟"في ناس بتضحك ليك وقلوبها من جوّة أرض عطشانة، مشققة من كترة الصبر.ونحنا بقينا نمشي شايلين أوجاعنا زي "صُرّة" مربوطة كويس، خايفين لو فتحناها قدّام زول.. تنكبّ مننا الدموع. مرات الإنسان ما بكون عايز حاجة كبيرة..بس داير ضُلّ آمن يسند فيهو روحو، وكلمة حنينة تربّت على قلبو وتقول ليهو:"أها.. تعبك ده كلو ما راح ساي."الدنيا دي ما مستاهلة كل الجري ده، الوجوه بتتبدل.. الحكايات بتنطفي.. والحاجة البتفضل في آخر المشوار، قلب نظيف ما أذى زول، وأثر طيب خلّيتو وراك من غير ما تحس.أوعك تخجل من تعبك..الجبال ذاتها بتتشقق من السكات، كيف قلبك الصغير ده ما يوجعك؟أرخِ يدك من حبال الهم..وطبطب على روحك شوية، دي الروح البتحارب كل يوم عشانك، حتى وهي موجوعة.ولو حسّيت إنو الدنيا ضاقت عليك..أطلع آخر الليل، شوف السماء وهي ساكتة كيف، وشوف القمر كيف واقف براهو لكن منوّر.. حتعرف إنو الوحدة مرات ما ضعف، الوحدة استراحة محارب.ما تستعجل للفرحة، ولا تطارد سراب، ولا تكسر قلبك عشان تلحق ناس ما منتظرينك.الليل مهما طال.. لا بدّ من الصباح يجي، فخليك حنين شديد على نفسك، العمر م بسبقوهو، والرزق مقسوم، والضل مصيرو يميل ويجيك في مكانك، بس خليك صاااابر. سلام من السودان الحبيبه 💪